«Арсенал» пен «Бавария» Чемпиондар лигасының жартылай финалына шықты

Ағылшындық «Арсенал» мен португалдық «Спортинг» арасындағы Чемпиондар лигасының ширек финалының жауап ойыны тең ойналды. Лондонда өткен кездесу есепсіз, 0:0 есебімен аяқталды.

Бірінші ойында 1:0 есебімен жеңіске жеткен «Арсенал» екі кездесудің қорытындысы бойынша турнирдің келесі кезеңіне өтті. Команда жартылай финалда мадридтік «Атлетиконы» күтеді. Бұл «Арсеналға» қатарынан екі маусымда турнирдің жартылай финалына шығуға мүмкіндік берді.

Басқа ширек финалдық жұпта мюнхендік «Бавария» мадридтік «Реалды» өз алаңында 4:3 есебімен ұтты. Неміс командасы үшін Александар Павлович (6-минут), Гарри Кейн (38-минут), Луис Диас (89-минут) және Майкл Олисе (90+4) доп соқты. Қарсыластар тарапынан Арда Гюлер екі рет (1-ші және 29-шы минуттар), ал Килиан Мбаппе бір рет (42-минут) дәл соққы жасады.

Ойын барысында «Реалдың» Эдуарду Камавингасы 86-шы минутта алаңнан шығарылды. Ал «Баварияның» бас бапкері Венсан Компани сары карточка алғаны үшін турнирдің келесі матчын өткізіп жібереді.

Статистика бойынша, осы ойындағы «Реалдың» негізгі құрамында тарихта бірінші рет испан футболшысы болмады. Сондай-ақ, Гарри Кейн Чемпиондар лигасында «Реалға» қарсы бес ойын қатарында нәтижелі әрекет жасаған алғашқы ойыншы атанды.

Екі кездесудің қорытындысы бойынша 6:4 жалпы есебпен жеңімпаз атанған «Бавария» жартылай финалда турнирдің ағымдағы жеңімпазы — париждік «Пари Сен-Жерменмен» кездеседі.