Жаңа оқу жылында студенттерді жатақханамен қамту мәселесі қалай шешіледі?
Үкімет отырысында ғылым және жоғары білім министрі Саясат Нұрбек 2026-2027 оқу жылына дайындық барысын баяндады. Алдағы оқу жылында елдегі студенттер саны 740 мыңнан асады деп күтілуде. Министрдің айтуынша, республика бойынша жатақхана тапшылығы негізінен шешілді, тек Алматы қаласында 5 176 орындық жетіспеушілік бар. Осы мәселені реттеу үшін биыл ел көлемінде 18 жаңа жатақхана пайдалануға берілмек. Сондай-ақ Астанада 22 тамызда Қазақ ұлттық спорт университетінің 1,5 мыңнан астам студентке арналған екі жаңа жатақханасы ашылады. Алматыда баспанасыз қалған студенттерге жедел көмек көрсету үшін Қыздар педагогикалық университеті базасында Ахуалдық орталық және ALT University жанынан 50 орындық Дағдарыс орталығы жұмыс істейтінін хабарлайды Өткір сөз.