Қазақстандағы оқушы орнының тапшылығы неге ушығып барады?
Қазақстанда оқушы орындарының тапшылығы 245 мыңға жетіп, соның салдарынан мектептер балаларды қабылдаудан бас тартуға мәжбүр болып отыр. Мектеп таңдау құқығы заңмен берілгенімен, білім ордасы санитарлық нормалар мен жобалық қуаттылық шегінен аса алмайды. Дегенмен, министрлік өкілдері орын жетіспеген жағдайда балалардың ата-аналардың қалауы ескеріліп, басқа жақын маңдағы мектептерге орналастырылатынын мәлімдеді. Биылғы оқу жылында бірінші сыныпқа қабылдау науқаны 31 тамызға дейін жалғасады және барлығы 380 мыңға жуық бала мектеп табалдырығын аттайды деп жоспарлануда. Соңғы жылдары ел аумағында жүздеген жаңа білім ошағы салынғанымен, әсіресе үлкен агломерациялар мен Алматы облысында үш ауысымды мектептер мәселесі әлі де өзекті күйінде қалып отыр.